D’Huab
(Gedicht von Dominik Baldinger-Purer)

Ganz im Süden vo unsra G’moa
liegt des Dörfe liab und kloa.

So 7 - 8 Heisa, a poa Hend voi Leut,
des is des Platzl wo uns s’Leben gfreit!
Rundum Wäda, Wiesn, Acka- sche,
mecht nirgens net wo ondas sei!
Weitmächti siagt ma umanand
vom Ötscha bis ins Bayernland.
Und d’Leit ob oit, ob jung, ob Mau, ob Frau
hom imma Zeit fia an Ratscha übern Goatnzau.

Was gschegn is duat und do, was im Goatn
grad is z’toa
wos ma gestan hat im Fernsehn gsegn,
des san de Sochan üba de ma redn!
Geht beim Kocha oan a Zuatat aus
so fragt ma hoit im Nachbarhaus.
Und is amoi wo Not am Mann
dann höf ma hoit glei alle zam.
Doch wann i amoi fuatgehn miasst
beim Hoamkemma mi von weiten scho da
Traunstoa griasst.

So mecht i eich sogn und des is gwiss
dass de Huab a b’sondas Platzl is!